بانگِ درا 84: فراق

نظم ”فراق“ از علامہ اقبال

تعارف

اِس نظم میں علامہ اقبال نے فراق کی کیفیت بیان کی ہے۔ اس میں تخیل کی بلندی کے ساتھ ساتھ بلاغت اور فنِ شاعری کا کمال بھی نظر آتا ہے۔

(شرح بانگِ درا از پروفیسر یوسف سلیم چشتی)

نظم ”فراق“ کی تشریح

بند نمبر 1

تلاشِ گوشۂ عُزلت میں پھر رہا ہُوں مَیں
یہاں پہاڑ کے دامن میں آ چھُپا ہوں مَیں

حلِ لغات:

تشریح:

محبوب کی جدائی نے مجھے سرگرداں بنا دیا ہے اور دُنیا کی دلچسپیوں سے بیزار ہو گیا ہوں۔  میری بے چینی اور اضطراب کا یہ عالم ہے کہ ایسے مقام کی تلاش میں مارا مارا پھر رہا ہوں جہاں تنہائی میسر آ سکے۔ چنانچہ اسی تلاش کے سبب پہاڑ کے دامن میں گوشہ گیر ہو گیا ہوں۔

شکستہ گیت میں چشموں کے دلبری ہے کمال
دُعائے طفلکِ گفتار آزما کی مثال

حلِ لغات:

تشریح:

یہاں پہاڑی چشموں کی آوازوں میں، جو وقفوں کے بعد پیدا ہوتی ہیں، بڑی دِلکشی پائی جاتی ہے۔ ایسا معلوم ہوتا ہے کہ جیسے کوئی بچہ اپنے ٹوٹے پھوٹے لفظوں میں دُعا مانگ رہا ہے (چھوٹے بچے کی توتلی زبان بہت دلکش ہوتی ہے اور اُس کے پاس بیٹھے ہوؤں کے دل موہ لیتی ہے۔)

ہے تختِ لعلِ شفَق پر جلوسِ اخترِ شام
بہشتِ دیدۂ بینا ہے حُسنِ منظرِ شام

حلِ لغات:

تشریح:

شام کا وقت ہے اور غروبِ آفتاب کے سبب جو شفق (طلوع اور غروبِ آفتاب کے وقت آسمان پر پھیلنے والی سُرخی) پھُوٹی ہے اس کے پس منظر میں شام کا ستارہ اپنی پناہ گاہ سے برآمد ہو رہا ہے۔  میں دیکھ رہا ہوں کہ یہ خوبصورت منطر بہِشت کے مناظر کی طرح حُسن و جمال سے ہم آہنگ ہے۔

سکُوتِ شامِ جُدائی ہُوا بہانہ مجھے
کسی کی یاد نے سِکھلا دیا ترانہ مجھے

حلِ لغات:

تشریح:

ہجر اور فرقت کی شام کی خاموشی میرے لیے بہانہ ثابت ہوئی اور محبوب کی یاد نے مجھے نغمے گانے پر مائل کر دیا۔

بند نمبر 2

یہ کیفیت ہے مری جانِ ناشکیبا کی
مری مثال ہے طفلِ صغیرِ تنہا کی

حلِ لغات:

تشریح:

میری بے قرار جان کی حالت و کیفیت ایک ننھے مُنے بچے کی سی ہے جو تنہا بیٹھا ہو۔ اُس بچے پر عجب کیفیت طاری ہوتی ہے۔ کبھی وہ رونے لگتا ہے اور کبھی خود ہی خاموش ہو جاتا یا مسکرانے لگتا ہے۔ (شاعر کا خود کو ایک بچے سے تشبیہ دینا اُس کی معصومیت کی طرف بھی اشارہ کرتا ہے۔)

اندھیری رات میں کرتا ہے وہ سرود آغاز
صدا کو اپنی سمجھتا ہے غیر کی آواز

حلِ لغات:

تشریح:

وہ ننھا بچہ اندھیری رات میں گیت کا آغاز کرتا ہے‘ یعنی اپنی پیاری زبان بولنے لگتا ہے اور اپنی آواز کو اپنی آواز سمجھنے کی بجائے کسی دوسرے کی آواز سمجھتا ہے اور اس طرح اپنے آپ کو فریب میں مبتلا کر دیتا ہے کہ اُس کا کوئی غمگُسار اُس کے پاس موجود ہے جو اُسے لوری دے رہا ہے یا دِل بہلا رہا ہے۔ (ان دو شعروں میں اقبالؔ نے حقیقت شناسی کا کمال دِکھایا ہے۔)

یونہی میں دل کو پیامِ شکیب دیتا ہوں
شبِ فراق کو گویا فریب دیتا ہوں

حلِ لغات:

تشریح:

میں بھی اُس چھوٹے بچے کی طرح اپنے دل کو مطمئن کرنے کی کوشش کر رہا ہوں اور یوں نغمے گا گا کر اپنی شبِ فراق کو فریب دینے کی کوشش میں مصروف ہوں۔ گویا عاشق اور شبِ ہجر میں صبر و قرار سے رہے؟ یہ ناممکن ہے۔ لہذا دل کو مذکورہ پیام دینا شبِ فراق کو فریب دینے کی مانند ہے۔

محبوب سے جدائی اور فراق کی گھڑیاں ایک عاشق کے لیے اس قدر کرب آمیز ہوتی ہیں کہ تمام ہنگامہ ہاؤ کو ترک کر کے کوئی ایسا گوشۂ تنہائی تلاش کرتا ہے جہاں فراق کے اس کرب سے نجات حاصل ہو سکے۔ وہاں وہ اپنی دھُن میں اسی طرح ہجر و فراق کے نغمے گا کر خود کو اس طرح سے فریب دیتا ہے جیسے ننھا بچہ اپنی غوں غاں کو دوسروں کی آواز جان کر خوش ہوتا ہے

نسیم امروہوی فرہنگِ اقبالؔ میں لکھتے ہیں کہ اِس نظم میں وہی کیفیت ہے جو مومنؔ کے درج ذیل شعر میں ہے:-

؎ تم میرے پاس ہوتے ہو گویا
جب کوئی دوسرا نہیں ہوتا

حوالہ جات

• شرح بانگِ درا از پروفیسر یوسف سلیم چشتی
• شرح بانگِ درا از ڈاکٹر خواجہ حمید یزدانی
• شرح بانگِ درا ا ڈاکٹر شفیق احمد
• شرح بانگِ درا از اسرار زیدی
• مطالبِ بانگِ درا از مولانا غلام رسول مہر